Төр, иргэний нийгмийн болон хувийн хэвшлийн байгууллагуудын гурван талт хамтын ажиллагааны гэрээ байгууллаа.

Өнөөдөр 10.30 цагт Аймгийн Засаг даргын Тамгын газрын хурлын танхимд төр, иргэний нийгмийн болон хувийн хэвшлийн гурван талт хамтын ажиллагааны гэрээнд төрийн байгууллагыг төлөөлж аймгийн Засаг дарга П.Ганхуяг, тргэний нийгмийн байгууллагыг төлөөлж аймгийн Иргэний нийгмийн байгууллагуудын сүлжээний ахлагч С.Азжаргал, хувийн хэвшлийн байгууллагыг төлөөлж аймгийн Ажил олгогч эздийн "Ханбаян" холбооны тэргүүн Д.Төмөртогоо нар гарын үсэг зурлаа. 

Мөн энэ үеэр Мерси кор Монгол олон улсын байгууллагаас хэрэгжүүлж буй "Төрийн худалдан авах ажиллагааны ил тод, нээлттэй байдлыг бэхжүүлэх төсөл"-ийн хүрээнд хийгдэж буй нэг ажил болох "Төрийн худалдан авалтын мэдлэгээ дээшлүүлье" сэдэвт 2 сарын аян зарлаж байгаа талаар танилцууллаа. Энэхүү аяныг зохион байгуулах ажлын хэсгийг аймгийн Засаг даргын 2013 оны 03 дугаар сарын 28-ны өдрийн А/166 дугаар захирамжаар байгуулсан юм.

Худалдан авах ажиллагааны журмыг сонгох босго үнэ шинэчлэн батлагдлаа

Засгийн газрын 2013 оны 03 дугаар сарын 02-ны өдрийн 68 дугаар тогтоолоор "Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах ажиллагаанд мөрдөх журмыг сонгоход баримтлах босго үнэ"-ийг шинэчлэн баталлаа. 

Энэ тогтоолоор батлагдсан босго үнийг бараа, ажил, үйлчилгээ худалдан авах ажиллагаанд мөрдөн ажиллахыг бүх шатны Төсвийн ерөнхийлөн захирагч нарт даалгалаа. 

Шинэчлэн баталсан босго үнийг доорх линкээс татаж авч танилцана уу.
http://www.legalinfo.mn/annex/details/5792?lawid=9084

Бизнес эрхлэгчдэд мэдээлэл өглөө

Дорноговь аймгийн Ажил олгогч эздийн холбооноос санаачлан 2013 оны 03 дугаар сарын 13-ны өдөр Гандирс зочид буудлын хурлын танхимд зохион байгуулсан Бизнес эрхлэгчдийн сургалтанд Худалдан авах ажиллагааны хууль, журам, тендерт хэрхэн оролцох талаар зөвлөгөө өгч, 2013 оны худалдан авах ажиллагааны төлөвлөлт, хэрэгжилтийн талаар товч мэдээлэл өгөв. Мөн энэ үеэр Хас банк ивээн тэтгэж "Дорноговийн шуудан" сонинд Аймгийн 2013 оны бараа, ажил, үйлчилгээ худалдан авах төлөвлөгөөг нийтлэн бизнес эрхлэгчдэд сурталчиллаа.

АЙМГИЙН 2013 ОНД БАРАА, АЖИЛ, ҮЙЛЧИЛГЭЭ ХУДАЛДАН АВАХ ЕРӨНХИЙ ТӨЛӨВЛӨГӨӨ

Худалдан авах ажиллагааны мэргэшсэн ажилтан бэлтгэх сургалт зохион байгууллаа

Монгол Улсын Төсвийн тухай хууль, Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийг хэрэгжүүлэх ажлын хүрээнд 2012 оны 02 дугаар сарын 22-24-ний хооронд аймгийн Засаг даргын Тамгын газар, ШУТИС-ийн КТМС-ийн Менежментийн багтай хамтран Худалдан авах ажиллагааны мэргэшсэн ажилтан бэлтгэх сургалтыг зохион байгууллаа. Сургалтанд хамрагдаж шалгалтанд тэнцсэнээр Худалдан авах ажиллагааны чиглэлээр мэргэшсэнийг гэрчлэх А3 сертификат олгож, Худалдан авах ажиллагааны үнэлгээний хорооны бүрэлдэхүүнд орж ажиллах эрхтэй болох юм. Энэ удаагийн сургалтанд сум бүрээс 5, 5 төрийн албан хаагч, иргэн, нийт 90 орчим хүнийг хамрууллаа.

ICOGS төслийг хэрэгжүүлж байна.

Орон нутагт төрийн болон орон нутгийн өмчийн хөрөнгөөр бараа, ажил, үйлчилгээ худалдан авах ажиллагааны нээлттэй, ил тод, үр ашигтай байдлыг бэхжүүлэхэд орон нутгийн төрийн болон төрийн бус байгууллага, хувийн хэвшлүүдийн холбоо харилцаа, хүлээх үүрэг хариуцлагыг уялдуулах, тогтвортой загвар бий болгох зорилгоор Мерси Кор Монгол олон улсын байгууллагаас хэрэгжүүлж буй Төрийн худалдан авах ажиллагааны нээлттэй ил тод байдлыг тогтворжуулах төсөл (ICOGS)-ийн хүрээнд аймгийн Засаг даргатай харилцан ойлголцлын санамж бичигт гарын үсэг зурав. Мөн төслийн хүрээнд төр, иргэний нийгмийн болон хувийн хэвшлийн 3 талт түншлэлийн зөвлөлийг байгуулан даргаар аймгийн ЗДТГ-ын Хөгжлийн бодлогын хэлтсийн даргын үүрэг гүйцэтгэгч Б.Баярмаа, дэд даргаар Хас банкны салбарын захирал Г.Оргилболд нарыг томилж, зөвлөлийн 2013 оны үйл ажиллагааны төлөвлөгөөгөө хэлэлцэн баталлаа.